ಟೊಂಕ ಕಡಲ ತೀರದಲ್ಲಿ ಆಲಿವ್ ರಿಡ್ಲೆ ಆಮೆಯ ವರ್ಷದ ಮೊದಲ ಮರಿಗಳು

ಹೊನ್ನಾವರ: ತಾಲೂಕಿನ ಕಾಸರಕೋಡ ಟೊಂಕ ಕಡಲ ತೀರದಲ್ಲಿ ಆಲಿವ್ ರಿಡ್ಲೆ ಆಮೆಯ ಮೊಟ್ಟೆಗಳು ಮರಿಯಾಗಿವೆ.

ಡಿ.24 ರಂದು ಟೊಂಕ ಕಡಲ ತೀರದಲ್ಲಿ ಕಡಲಾಮೆಯು ಮೊಟ್ಟೆ ಇಟ್ಟಿತ್ತು. 124 ಮೊಟ್ಟೆಗಳನ್ನು ಸ್ಥಳೀಯ ಮೀನುಗಾರ ಮುಖಂಡರಾದ ರಾಜೇಶ ತಾಂಡೆಲ್, ರಮೇಶ ತಾಂಡೇಲ್ ಹಾಗೂ ಭಾಸ್ಕರ ತಾಂಡೆಲ್ ಅವರು ಗುರುತಿಸಿ, ಅರಣ್ಯ ಇಲಾಖೆ ಸಹಕಾರದೊಂದಿಗೆ ಮೊಟ್ಟೆಗಳನ್ನು ಸುರಕ್ಷಿತ ಜಾಗದಲ್ಲಿ ಸ್ಥಳಾಂತರಿಸಿ ಅವುಗಳಿಗೆ ನೆಟ್ ಇಂದ ಸುತ್ತ ಬೇಲಿ ಹಾಕಿ ನಾಯಿ ಹಾಗೂ ಪಕ್ಷಿಗಳಿಂದ ಸುರಕ್ಷತೆ ವಹಿಸಲಾಗಿತ್ತು.

ಬುಧವಾರ ಬೆಳಗಿನ ಜಾವ ಆ ಮೊಟ್ಟೆಗಳು ಮರಿಯಾಗಿದ್ದು 95 ಮರಿಗಳನ್ನು ಉಪ ವಲಯ ಅರಣ್ಯಾಧಿಕಾರಿ ಮಂಜುನಾಥ ನಾಯ್ಕ ಅವರ ನೇತ್ರತ್ವದಲ್ಲಿ, ಹೊನ್ನಾವರ ಫೌಂಡೇಶನ್ ಸಹಕಾರದೊಂದಿಗೆ ಸಮುದ್ರಕ್ಕೆ ಬಿಡಲಾಯಿತು. ಅಳಿವಿನ ಅಂಚಿನಲ್ಲಿರುವ ಆಮೆಗಳ ಸಂರಕ್ಷಣೆಗೆ ಶ್ರಮವಹಿಸಿದ ಅರಣ್ಯ ಇಲಾಖೆ ಸಿಬ್ಬಂದಿ, ಮೀನುಗಾರ ಮುಖಂಡರು, ಸ್ಥಳೀಯರು ಹಾಗೂ ಹೊನ್ನಾವರ ಫೌಂಡೇಶನ್ ಗುರುಪ್ರಸಾದ ಈ ಸಂದರ್ಭದಲ್ಲಿ ಹಾಜರಿದ್ದರು.